A PSPD critica a falta de previsión da Administración en materia de evolución móbil ante a chegada da tecnoloxía 5G

7/08/2019
  • As institucións fallaron á hora de desenvolver unha campaña informativa completa e con auténtico alcance social

PSPD

O pasado mes de xuño o Goberno aprobou o Plan Técnico Nacional da televisión dixital terrestre (TDT) que regula o Segundo Dividendo Dixital para facer efectiva a implantación da tecnoloxía 5G. O Segundo Dividendo Dixital é un proceso mediante o cal se libera a banda de 694-790 MHz (agora 700 MHz) do espectro radioeléctrico para reagrupar os canais da TDT e deixar espazo suficiente para a introdución da tecnoloxía 5G, a cal permitirá unha conexión a internet máis rápida. O prazo para desenvolver esta operación, coordinada desde a Unión Europea, remata o 30 de xuño de 2020 e segundo informan desde a Administración  non habería que volver a facer ningún outro cambio nunha década.

Non obstante, a realidade é que en poucos anos se tivo que resintonizar a TDT varias veces, unha situación que para a Plataforma pola Seguridade e a Privacidade Dixital (PSPD)[1] denota unha total falta da previsión sobre a evolución da telefonía móbil por parte da Administración, deixamento que afectou directamente ao peto dos consumidores.

As persoas que viven en edificios, a maioría da poboación española, terán que facerse cargo do custo da adaptación das instalacións de recepción de televisión, gasto que xa tiveron que sufragar anos atrás. Así é que o programa de subvencións de 150 millóns anunciado pola Administración só permitirá aliviar a carga económica dunha parte das comunidades de propietarios do país, que posúen, non hai que esquecerse, a condición de consumidores.

Desde a PSPD inciden na necesidade de que a Administración artelle unha campaña informativa moito máis completa que explique á cidadanía todos os aspectos técnicos do Segundo Dividendo Dixital indo máis alá daquelas comunicacións que se limitan a indicar como se debe resintonizar o televisor ou a informar de que os aparatos máis antigos quedarán obsoletos no ano 2023.


[1] Impulsada pola Unión de Consumidores de Galicia (UCGAL), a Asociación de Internautas e a Asociación Pro Derechos Civiles Económicos y Sociales (ADECES)

Deixa unha resposta