UCGAL organiza o I Congreso Internacional de Consumo.

Coa colaboración da Consellería do Mar, a Axencia Galega da Calidade Alimentaria, ASUGA, CETMAR e ConsumES.

O hotel NH Collection de Santiago, acolleu os días 30 de novembro e 1 de decembro o maior evento divulgativo de consumo desenvolvido en España durante o ano 2023. Máis de 50 profesionais participaron nas diferentes ponencias e mesas de debate, nunha actividade que rexistrou máis de 150 congresistas procedentes de diversas partes de España e Europa. Ademais, contamos coa participación da DECO, a principal organización de consumidores de Portugal e de SAFE, entidade lobista europea da que UCGAL forma parte. 

Alimentos de calidade diferenciada

O director da AGACAL, José Luis Cabarcos, foi o encargado de inaugurar a segunda das sesións do congreso que versou sobre os Alimentos de calidade diferenciada, e nela expuso o traballo que desde a institución que dirixe se está a facer para por en valor os alimentos galegos de calidade diferenciada amparados baixo distintas DOP ou IXP, alimentos ecolóxicos ou incluídos na marca artesanía alimentaria de galicia.

A directiva da UCGAL, Carolina Castro anunciou o contido do primeiro dos cadernos de boas prácticas que UCGAL e AGACAL elaborarán conxuntamente e que se centrará no etiquetado de alimentos e cuxa presentación está prevista para o primeiro trimestre de 2024.

Na mesa Os alimentos con DOP e IXP, expertos de primeiro nivel abordaron o impacto que este tipo de alimentos teñen na economía local, os elementos que os diferencian, a súa calidade, prezo e accesibilidade. Igualmente debatiron sobre os desafíos e retos aos que se enfrontan e en especial como chegar aos diferentes perfís de persoas consumidoras. Baixo a maxistral dirección de Prudencio Prieto, presidente da Unión de Consumidores de Castilla e León, participaron magníficos representantes de diferentes consellos reguladores de DOP ou IXP españolas, como Enrique Pascual (presidente da DOP Ribera del Duero), Mané Calvo (presidente da DOP Mexillón de Galicia), Félix Ajuria (presidente da DOP Queso Idiazábal), Moisés Caballero (secretario xeral da DOP Estepa) e Luis Antonio Vázquez (director de promoción e relacións externas da IXP Ternera Gallega).

A segunda mesa da sesión, Alimentos ecolóxicos, estivo moderada por Oriol Roa, director da Unió de Consumidors de Catalunya e nela participaron, Ana Díaz Pérez (subdirectora xeral de calidade e sustentabilidade alimentaria do MAPA), Rocío Freire (vicepresidenta do CRAEGA), José Costoya (coordinador institucional de INTERECO) e Diego Granado (secretario xeral de ECOVALIA). Os expertos afondaron no horizonte de producción ecolóxica para 2030 que marca o pacto verde europeo, nos elementos que diferencian estes produtos e nas crecentes cifras do seu consumo. Igualmente deron resposta ás principais dúbidas que se plantexan ás persoas consumidoras sobre o carácter ecolóxico dun alimento.

A directora técnica da Fundación vasca para a seguridade agroalimentaria - ELIKA, Amaia de Ariño e a presidenta da Fundación Española da Nutrición, Rosaura Leis, abordaron respectivamente os aspectos relacionados coa seguridade alimentaria e nutricionais dos alimentos de calidade diferenciada.

Foi un pracer contar coa participación de Daniel Gómez - Bravo, CEO de BREADFREE, e gozar da ilusión dun equipo de xoves profesionais que están a piques de por no mercado productos destinados a persoas intolerantes ao glute, xa que a súa empresa foi quen de illar os elementos que xeran intolerancia nas fariñas de trigo, cebada e centeno.

A secretaria xeral e o director técnico de SAFE Advocacy Europe, Floriana Cimmarusti e Luigi Tozzi fixeron unha breve presentación dos obxectivos que persegue esta organización europea da que UCGAL forma parte e que desde Bruselas traballa para defender os dereitos das persoas consumidoras europeas no eido da alimentación. Tozzi, desenvolveu unha ponencia na que incidía no prezo dos alimentos en Europa, a súa evolución e as políticas de marxes comerciais coas que traballa a industria e a distribución.