UCGAL organiza o I Congreso Internacional de Consumo.

Coa colaboración da Consellería do Mar, a Axencia Galega da Calidade Alimentaria, ASUGA, CETMAR e ConsumES.

O hotel NH Collection de Santiago, acolleu os días 30 de novembro e 1 de decembro o maior evento divulgativo de consumo desenvolvido en España durante o ano 2023. Máis de 50 profesionais participaron nas diferentes ponencias e mesas de debate, nunha actividade que rexistrou máis de 150 congresistas procedentes de diversas partes de España e Europa. Ademais, contamos coa participación da DECO, a principal organización de consumidores de Portugal e de SAFE, entidade lobista europea da que UCGAL forma parte. 

Preferencias do consumidor e sustentabilidade

Tralo saúdo da xerente do IGCC, Sol Vázquez deu inicio a terceira sesión do congreso que analizaría as Preferencias do consumidor e a sustentabilidade. A Xefa de área da subdirección xeral de promoción dos alimentos de España do MAPA, Ana Mendoza, abordou a variación de hábitos das persoas consumidoras nun contexto de post-pandemia, tanto que atinxe a frecuencias, establecementos como a tipoloxía de produtos.

A primeria mesa do día 1 de decembro Preferencias e necesidades dos consumidores, foi moderada polo secretario xeral da Unión de Consumidores da Comunitat Valenciana, Vicente Inglada e estivo composta pola catedrática de comercialización e investigación de mercados da UDC, Cristina Calvo; Paula Cinto, responsable de sustentabilidade de FIAB; Melisa Pagliaro, directora de marketing e RSE de GADISA e por Delmiro Hermida, membro fundador de METRAE. Os participantes na mesa afondaron en aspectos como a cada vez maior esixencia das persoas consumidoras, o etiquetado, a saúde ou a responsabilidade social empresarial, e debullaron as principais estratexias que desde os seus departamentos seguen para acadar resposta ás demandas das persoas usuarias e do conxunto da sociedade.

Antes de abordar a segunda mesa, Maria Devesa, directiva da UCGAL deu a coñecer os principais datos do estudo ¿Eres un consumidor sustentable? desenvolvido durante o mes de outubro e novembro de 2023. Neste estudo ponse de manifesto que aínda que as persoas consumidoras teñen unha boa imaxe de si mesmas, a realidade dos seus hábitos e condutas non se corresponde en igual medida.

Non podemos negar que o uso de algoritmos e da intelixencia artificial está presente cada vez en maior número de eidos e o sector do consumo non é alleo. O experto xurista en dereito das novas tecnoloxías, Miguel Vieito, analizou e puxo exemplos do uso destas ferramentas no sector do consumo e advertiu das eivas e riscos derivados dun uso indebido das mesmas e os efectos que poden ter para as persoas usuarias en particular e para a sociedade en xeral.

A segunda das mesas, a sustentabilidade no sector da alimentación, estivo moderada por Fernando Martíns Viana, director executivo do alto tribunal arbitral CIAB e formaron parte da mesma, Floriana Cimmarusti, secretaria xeral de SAFE Advocacy Europe; Jacobo Feijoó de UPA; Bruno de Llano, delegado de ECOEMBES en Galicia; Brígida Nieto, directora de marketing e comunicación de FROIZ e Verónica Marcos, presidenta de FADEMUR Galicia. Os participantes na mesa afondaron nos tres eixos da sustentabilidade, a social, a económica e a ambiental e detallaron as necesidades e desafíos aos que nos enfrotamos en materia de sustentabilidade e soberanía alimentaria. Valoraron o papel das novas tecnoloxías e innovacións como ferramenta cara a consecución destes obxectivos e puxeron o foco no importante papel que xogan as persoas consumidoras coas súas decisións de compra. 

A visión das empresas que se encargan de fornecer de produtos á gran distribución e seu importante papel a prol da sustentabilidade foi desgranada por Víctor Yuste, director xeral do Foro Interalimentario, quen non dubidou en puntualizar o impotante papel que están a desenvolver desde a industria e a distribución para garantir unha oferta de alimentos constante e de calidade.

O director técnico de SAFE Advocacy Europe, Luigi Tozzi foi contundente na súa intervención poñendo de manifesto os grandes intereses lobistas que están a impedir que as persoas consumidoras en Europa conten con información relevante no etiquetado dos alimentos (v.gr. orixe dos ingredientes) ou polo contrario a infoxicar con contidos que realmente dificultan a decisión de compra dos consumidores. Criticou a decisión da Comisión Europea por prorrogar outros 10 anos o uso do glifosato malia que nesta ocasión boa parte dos estados membros estaban en contra de tal medida.

Grandioso estivo Gumersindo Feijoó, cuxas ponencias nunca defraudan nin deixan indiferente. Poñer cifras ao noso desperdicio alimentario non é tarea fácil pero resulta imprescindible para educar ás persoas consumidoras. Cambiar os seus hábitos cando coñece os cartos perde ou a súa pegada hídrica e de carbono, resulta máis doado. Neste artigo, explica con detalle estas cuestións.

A clasura oficial do Congreso correu a cargo do delegado do Goberno en Galicia, Pedro Blanco Lobeiras, quen loubou o traballo divulgativo desenvolvido por UCGAL e fixo público o seu ofrecemento para apoiar as iniciativas que a organización lle traslade no futuro.

Rocío Arnoso, presidente da UCGAL pechou o I Congreso Internacional de Consumo, agradecendo a todas e todos os congresistas, ponentes, participantes e autoridades o seu apoido ao que sen dúbida foi o maior evento divulgativo do ano 2023 en toda España e emplazando ao próximo evento sobre o que xa estamos a traballar.