Unión de Consumidores de Galicia e a Confederación Intersindical Galega - CIG, poñen en marcha unha campaña dirixida a acadar a modificación da contía exenta de tributación establecida no Regulamento do IRPF para os gastos de locomoción. Esta contía establecida en 0,19 céntimos leva sen modificarse desde o ano 2007, nun contexto no que durante este tempo o IPC medrou máis dun 35% e no caso concreto do transporte, máis dun 42%.
Ambas as dúas entidades iniciaron a súa campaña con senllas cartas dirixidas á ministra de facenda, María Jesús Montero, e á ministra de traballo, Yolanda Díaz. A responsable de facenda é a titular da carteira competente para modificar o alcance da exención e a titular de traballo a competente para defender o dereito de millóns de traballadores a ver compensados os gastos nos que incorren cando deben facer uso do seu vehículo particular para uso laboral ou profesional.
Nas cartas remitidas, o secretario xeral da UCGAL, Miguel López, e o Secretario de Institucional da CIG, Miguel Malvido, conclúen que a contía exenta establecida no artigo 9 do RD 439/2007 non basta para cubrir o custe real que para os contribuíntes do territorio común supón percorrer un quilómetro cos seus vehículos particulares, e que ademais esta situación ven producíndose desde hai tempo.