Nace CONSUMES, a confederación de consumidores na que conflúe a maior experiencia de España na defensa dos dereitos das persoas consumidoras.

A organización xorde co obxectivo de impulsar as políticas de defensa das persoas consumidoras a nivel estatal.

O pasado martes 23 de maio, na sede o Consello Económico e Social de Galicia tivo lugar o acto de constitución de ConsumES organización de consumidores e usuarios de ámbito estatal integrada por seis das organizacións de consumidores autonómicas con máis presenza institucional, territorial e mediática do Estado. 

Unión de Consumidores da Comunitat Valenciana, Unión de Consumidores de Galicia, Unión de Consumidores de Euskadi, Unió de Consumidors de Catalunya -UCC, Unión de Consumidores de Castilla y León e Unión de Consumidores de Cantabria suman unha longa experiencia na defensa das persoas consumidoras e usuarias do o noso país e unha traxectoria que data do inicio do movemento consumerista español.

As seis asociacións e federacións que conforman a nova organización consideran que era necesario introducir no escenario nacional unha alternativa á limitada actividade no desenvolvemento de políticas e actuacións centradas nas persoas consumidoras, en particular as dirixidas ao fomento da súa educación, formación e defensa no ámbito institucional. Do mesmo xeito, as entidades integrantes de ConsumES comparten a necesidade de dotarse de mecanismos propios de organizacións de consumidores de ámbito estatal e que lles permitirán o desenvolvemento de actuacións no ámbito político, lexislativo e xurisdicional difíciles de abordar desde o ámbito territorial autonómico propio de cada unha delas. 

Colaboración, interlocución, participación e internacionalización son algúns dos piares da estratexia de actuación dunha organización que considera a necesidade de abordar a transversalidade que o mundo do consumo adquiriu ao longo dos anos no ámbito nacional e internacional.

Para enfrontar estes retos e desafíos, ConsumES apostou por un equipo con sobrada traxectoria e experiencia, conformado por Vicente Inglada Alcaide (secretario da Unión de Consumidores da Comunitat Valenciana) que ostentará a presidencia; Miguel López Crespo (secretario xeral de Unión de Consumidores de Galicia) na vicepresidencia; Ana Alzaga Menaza (secretaria xeral da Unión de Consumidores de Euskadi) na secretaría; Salvador Domínguez Rodríguez (presidente de Unió de Consumidors de Catalunya) a cargo da tesourería; Prudencio Prieto Cardo (presidente de Unión de Consumidores de Castilla y León) e Juan José Maestro Gallardo (presidente de Unión de Consumidores de Cantabria), ambos nas vogalías.